Farg‘onada 16 nafar hokim yordamchisi javobgarlikka tortildi
Ular tadbirkorlarning kredit ajratish bilan bog‘liq murojaatlariga belgilangan tartibda xulosa bermagan.
Farg‘ona viloyatida tadbirkorlarning kredit olish bilan bog‘liq murojaatlarini ko‘rib chiqishda qonunbuzilishlarga yo‘l qo‘ygan 16 nafar hokim yordamchisi ma’muriy javobgarlikka tortildi. Bu haqda Biznes-ombudsman tomonidan ma’lum qilindi.
Qayd etilishicha, online-mahalla.uz platformasi orqali kelib tushgan murojaatlar tahlili davomida viloyatda 34 ta holatda hokim yordamchilari tadbirkorlarning kredit ajratish bo‘yicha arizalariga belgilangan tartibda xulosa bermagani aniqlangan.
Amaldagi tartibga ko‘ra, Vazirlar Mahkamasining 2022-yil 8-iyuldagi 373-son qarori bilan tasdiqlangan nizomga muvofiq, hokim yordamchisi ariza asosida joyiga chiqib o‘rganish o‘tkazishi, natijalar bo‘yicha fotohisobot tayyorlashi hamda 5 ish kuni ichida kredit ajratish yoki rad etish yuzasidan xulosani yagona elektron platformaga joylashtirishi lozim.
Tahlillar yakuniga ko‘ra, ushbu talablarni bajarmagan 16 nafar mansabdor shaxsga nisbatan ma’muriy choralar ko‘rilgan. Shuningdek, tadbirkorlarga kredit olish bo‘yicha zarur xulosalar berilishi ta’minlangan.
