“Haydovchi tajribasizligi va chalg‘ishi oqibatida rul boshqaruvini yo‘qotgan”
Navoiy viloyatida bog‘cha bolalari bilan sodir bo‘lgan YTH yuzasidan rasmiy ma’lumot berildi.
Navoiy viloyatida bog‘cha bolalari bilan YTH sodir bo‘lgani haqida xabar berilgandi. Ushbu holat yuzasidan viloyat YHXB rasmiy ma’lumot berdi.
Ma’lum qilinishicha, 2026-yil 5-may kuni soat 09:05 atrofida Navoiy viloyati Nurota tumani “Yangi hayot” MFY hududidan o‘tuvchi mahalliy ahamiyatdagi 85V-043 avtomobil yo‘lining 8–9-kilometrlar oralig‘ida yo‘l-transport hodisasi sodir bo‘lgan.
Dastlabki ma’lumotlarga ko‘ra, 1992-yilda tug‘ilgan G.Q. tegishli hujjatlarsiz “Matiz” rusumli avtomobilni boshqarib ketayotib, tajribasizligi va chalg‘ishi oqibatida rul boshqaruvini yo‘qotgan. Natijada avtomobil yo‘lning chap tomoniga chiqib ketib, ag‘darilgan.
Hodisa oqibatida haydovchi ko‘rsatilgan tibbiy muolajalarga qaramay shifoxonada vafot etgan. Avtomobilda bo‘lgan 14 nafar voyaga yetmagan yo‘lovchi turli darajadagi tan jarohatlari bilan shifoxonaga yotqizilgan.
Surishtiruvlar davomida haydovchi G.Q. oilaviy nodavlat maktabgacha ta’lim tashkiloti rahbari sifatida faoliyat yuritgani aniqlangan. Shuningdek, voyaga yetmaganlarning yengil avtomobilda belgilangan qoidalarga zid tarzda tashilgani qayd etilgan.
Mazkur holat yuzasidan tergovga qadar surishtiruv harakatlari olib borilmoqda.
