Suriyada o‘zbekistonlik jangarilar qo‘lga olindi — Reuters
2025-yilda mamlakatda taxminan 1500 nafar o‘zbekistonlik jangari borligi, ularning ayrimlari oilalari bilan birga yashayotgani ma’lum bo‘lgan.
Suriya xavfsizlik kuchlari mamlakat shimoli-g‘arbida o‘tkazilgan maxsus operatsiya davomida o‘zbekistonlik jangarilarni hibsga oldi. Bu haqda ikki nafar Suriya xavfsizlik xodimi Reuters agentligiga ma’lum qildi.
Manbalarga ko‘ra, voqea Idlib viloyatida yuzaga kelgan keskinlik ortidan sodir bo‘lgan. Avvalroq hukumat kuchlari Idlib shahrida otishma sodir etganlikda gumon qilingan o‘zbekistonlik jangarini qo‘lga olishga uringan. Ushbu urinish qurollangan jangarilar tomonidan norozilik namoyishlariga sabab bo‘lib, ular hibsga olingan shaxsni ozod qilishni talab qilgan.
Keyinchalik vaziyat keskinlashib, Idlibning Kafriya va al-Fua tumanlarida xavfsizlik reydlari o‘tkazilgan. Operatsiya davomida namoyishlarda ishtirok etgan va xavfsizlik kuchlari tomonidan “nishonga olingan” o‘zbekistonlik jangarilar qo‘lga olingan. Hududda harbiy kuchlar va texnika joylashtirilgani, ayrim joylarda otishma ovozlari eshitilgani qayd etilgan. Suriya Ichki ishlar vazirligi Reuters so‘roviga darhol izoh bermagan.
Hozircha qancha o‘zbekistonlik jangari hibsga olingani aniq emas.
Reuters’ga ko‘ra, Suriya xavfsizlik manbasi o‘tgan yili mamlakatda taxminan 1500 nafar o‘zbekistonlik jangari bo‘lgani, ularning ayrimlari oilalari bilan birga yashayotganini bildirgan.
Mazkur hodisa Suriya hukumati va xorijiy jangarilar o‘rtasidagi so‘nggi oylardagi ikkinchi yirik to‘qnashuv sifatida baholanmoqda. Avvalroq Idlib yaqinida fransuz jihodchisi Omar Diabi (Omar Omsen) bilan bog‘liq lager atrofida ham keskinlik yuzaga kelgan.
Suriya hukumati so‘nggi yillarda xorijiy jangarilar maqomini tartibga solish va ularning bir qismini yangi tuzilayotgan davlat armiyasi tarkibiga integratsiya qilishga harakat qilmoqda. Ayrim xorijiy jangarilar allaqachon xavfsizlik tuzilmalarida yuqori lavozimlarga tayinlangan.
Reuters ma’lumotiga ko‘ra, AQSh ham ilgari Suriya rejasi doirasida minglab xorijiy jangarilarni rasmiy harbiy tuzilmalarga qo‘shish tashabbusini ma’qullagan, bu esa ularni davlat nazoratiga olish strategiyasi sifatida baholangan.
