Buxoroda YPX xodimi piyodani urib ketdi
Ijtimoiy tarmoqlarda tarqalgan xabarlarga oydinlik kiritildi.
Ijtimoiy tarmoqlarda Buxoro viloyati Vobkent tumanida YPX xodimi avtomobilda piyodani urib yuborgani haqida xabarlar tarqaldi. Holat yuzasidan Buxoro YHXB rasmiy ma'lumot berdi.
Ma’lum qilinishicha, hodisa 2026-yil 27-aprel kuni soat 09:05 atrofida Vobkent tumani, Imom Buxoriy ko‘chasida sodir bo‘lgan. Viloyat Yo‘l harakati xavfsizligi boshqarmasi xodimi, 1987-yilda tug‘ilgan Y. Mavlonov o‘ziga tegishli “Cobalt” rusumli avtomobilda harakatlanayotib, piyodalar o‘tish joyidan yo‘lni kesib o‘tayotgan 2009-yilda tug‘ilgan piyodani urib yuborgan.
Hodisa oqibatida piyoda yengil tan jarohati olgan. Bildirilishicha, YPX xodimi jabrlanuvchini birinchi tez tibbiy yordam ko‘rsatish maqsadida shifoxonaga olib borgan.
Rasmiy ma’lumotga ko‘ra, xodim hodisa vaqtida xizmat vazifasini bajarayotgan bo‘lgan, hushyor holatda bo‘lgan hamda avtomobil boshqarish uchun barcha tegishli hujjatlarga ega bo‘lgan.
Mazkur holat yuzasidan Vobkent tumani prokuraturasi tomonidan tergovga qadar tekshiruv o‘tkazilmoqda.
Shuningdek, mutasaddilar ijtimoiy tarmoqlarda ushbu hodisa “yopdi-yopdi qilinayotgani” haqida tarqalayotgan xabarlar asossiz ekanini bildirgan. Yolg‘on xabar tarqatgan fuqaroga nisbatan qonunda belgilangan tartibda chora ko‘rish maqsadida surishtiruv ishlari olib borilayotgani aytilgan.
