O‘zbekistondagi top-blogerlar bir yilda 2,7 mlrd so‘m daromad olib, 110 mln so‘m soliq to‘ladi
Blogerlar faoliyati tahlil qilinib, sohaning eng faol 110 nafar vakili ro‘yxati shakllantirildi. 6 nafar top-bloger faoliyati alohida o‘rganildi.
O‘zbekistondagi 6 nafar top-bloger 2025-yilda 2,7 milliard so‘m daromad olgan va budjetga 110,4 million so‘m soliq to‘lagan. Bu haqda Soliq qo‘mitasida blogerlar bilan o‘tkazilgan uchrashuvda ma’lum qilindi.
Qo‘mita tomonidan blogerlar faoliyati tahlil qilinib, sohaning eng faol 110 nafar vakili ro‘yxati shakllantirilgan. O‘rganishlarga ko‘ra, ulardan 55 nafari o‘zini o‘zi band qilgan shaxs, 33 nafari yakka tartibdagi tadbirkor sifatida ro‘yxatdan o‘tgan. Qolgan 22 nafar bloger esa jismoniy shaxs maqomida faoliyat yuritmoqda.
Soliq qo‘mitasi bu holat blogerlar faoliyatining haqiqiy ko‘lami bilan ularning huquqiy maqomi o‘rtasida nomutanosiblik mavjudligini ko‘rsatishini qayd etdi.
Shuningdek, 3 milliondan ortiq obunachiga ega 6 nafar top-bloger faoliyati alohida o‘rganilgan. Aniqlanishicha, ular 2025-yil davomida 360 ta storis va 184 ta reklama posti joylashtirgan.
Elektron hisobvaraq-fakturalar asosidagi rasmiy hisobotlarga ko‘ra, mazkur blogerlarning jami daromadi 2,7 milliard so‘mni tashkil etgan. Budjetga esa 110,4 million so‘m miqdorida soliq to‘langan.
Uchrashuv davomida blogerlarga reklama daromadlarini soliqqa tortish bo‘yicha qonunchilik normalari tushuntirilgan. Xususan, o‘zini o‘zi band qilgan shaxs maqomi xodim yollash huquqini bermasligi, biroq ayrim blogerlar administrator va yordamchilarni jalb qilayotgani ta’kidlangan.
Tomonlar sohada soliq majburiyatlarini tushuntirish va huquqiy savodxonlikni oshirishga qaratilgan o‘quv tadbirlarini tashkil etish taklifini ham muhokama qilgan.
