O‘zbekistonda 3 oyda 63,6 trln so‘m soliq tushumi qayd etildi
2026-yilning birinchi choragida soliq tushumi 2025-yilning mos davriga nisbatan 24 foizga oshdi.
Soliq organlari tomonidan 2026-yilning I choragida respublika bo‘yicha budjetga 63,6 trln so‘m tushumlar ta’minlandi. Bu haqda Soliq qo‘mitasi xabar berdi.
Ma'lum qilinishicha, bu o‘tgan yilning mos davriga nisbatan 24 foizga ko‘p.
Soliq turlari kesimida eng katta tushum foyda solig‘iga to‘g‘ri kelib 20,4 trln so‘mni tashkil qildi. Ushbu turda 2025-yil mos davriga nisbatan 43 foizlik o‘sish qayd etildi.
QQS bo‘yicha tushum 27 foizga oshib, 12,5 trln so‘m yig‘ildi. Jismoniy shaxslardan olinadigan daromad solig‘i 10,7 trln so‘mni tashkil etib, 15 foizga ko‘paydi. Yer qa’ridan foydalanganlik uchun soliq 6 trln so‘m bo‘lib, 17 foizga oshdi.
Aksiz solig‘i 4,6 trln so‘mni (1%), aylanmadan olinadigan soliq 0,6 trln so‘mni (12%), suv resurslaridan foydalanganlik uchun soliq - 0,4 trln so‘mni (82%) tashkil qildi.
Yer solig‘i 2,8 trln so‘mga (34%), mol-mulk solig‘i 2,3 trln so‘mga (11%) yetdi.
Shuningdek, soliqsiz tushumlar, ya’ni dividend to‘lovlari, boj, yig‘im, jarima va boshqa to‘lovlar uchun 3,3 trln so‘m (1%) yig‘ildi.
Avvalroq 2026-yilning birinchi choragida mamlakatda faoliyat yuritayotgan 89 ta xorijiy IT va raqamli servis kompaniyasi jami 65,7 milliard so‘m soliq to‘lagani haqida xabar berilgandi.
