Sirdaryoda me’yordan ortiq bog‘cha bolalarini olib ketayotgan Damas’lar aniqlandi
Avtomobillarning birida 22 nafar, ikkinchisida 24 nafar bog‘cha bolasi bo‘lgan.
Sirdaryo viloyati Mirzaobod tumanida o‘tkazilgan nazorat-reyd tadbirlarida bog‘cha bolalarini me’yordan ortiq tashib ketayotgan ikki dona Damas avtomobili aniqlanib, to‘xtatildi. Bu haqda viloyat Yo‘l harakati xavfsizligi boshqarmasi xabar berdi.
Ma'lum qilinishicha, YHXB xodimlari tomonidan to‘xtatilgan avtomobillarning birida 22 nafar, ikkinchisida esa 24 nafar bog‘cha tarbiyalanuvchisi olib ketilayotgan bo‘lgan.
Tekshiruv davomida haydovchilardan biri avval transport vositasini boshqarish huquqidan mahrum etilganiga qaramay, yana avtomobil boshqarib yurgani aniqlangan.
Holat yuzasidan xususiy maktabgacha ta’lim tashkiloti mas’ullari hamda haydovchilar bilan profilaktik tushuntirish ishlari olib borilgan.
Shuningdek, haydovchilarga nisbatan Ma’muriy javobgarlik to‘g‘risidagi kodeksning 135-moddasi 2-qismi hamda 128−8-moddasi 1-qismi asosida ma’muriy bayonnomalar rasmiylashtirilgan.
Qoidabuzarlik sodir etgan avtomobillar vaqtincha saqlash uchun jarima maydoniga joylashtirilgan.
Eslatib o‘tamiz, avvalroq Navoiy viloyatida 14 nafar bog‘cha bolasini olib ketayotgan Matiz yo‘l-transport hodisasiga uchragandi. Avtomobilni haydovchilik guvohnomasiga ega bo‘lmagan oilaviy bog‘cha rahbari boshqargan. Hodisa oqibatida ayol halok bo‘lgan, bolalar esa turli tan jarohatlari bilan shifoxonaga yotqizilgandi.
