Italiyaning O‘zbekistondagi sobiq elchisi Rimda hibsga olindi
Sobiq elchi rossiyaliklarga noqonuniy viza sotishda ayblanmoqda.
Italiyaning O‘zbekistondagi sobiq elchisi Piergabriele Papadia de Bottini di Sant’Agnese Rim shahrida korrupsiya va noqonuniy migratsiyaga ko‘maklashish ayblovlari bilan hibsga olindi.
Italiyaning “la Repubblica” nashri ma’lumotiga ko‘ra, Rim prokuraturasi sobiq diplomatni rossiyalik fuqarolar uchun noqonuniy tarzda uzoq muddatli turistik vizalar rasmiylashtirish sxemasini tashkil etganlikda gumon qilmoqda.
Tergovchilar fikricha, Papadia o‘z yordamchisi Tatiana Tarakanova bilan birgalikda Shengen hududi talablariga javob bermaydigan shaxslarga vizalar berilishiga ko‘maklashgan. Rasmiy konsullik yig‘imi 45–60 yevro bo‘lganiga qaramay, noqonuniy vizalar uchun 4 mingdan 16 ming yevrogacha mablag‘ olingani aytilmoqda.
Ma’lum qilinishicha, ushbu sxemada Moskvadagi bir nechta turoperatorlar ham ishtirok etgan. Hujjatlar Italiyaning Toshkentdagi elchixonasiga yuborilgan va ayrim murojaatchilar O‘zbekistonda yashamagani hamda konsullikka shaxsan kelmagani qayd etilgan.
Surishtiruv ishlari 2025-yilda Italiya Tashqi ishlar vazirligi tomonidan o‘tkazilgan inspeksiyadan so‘ng boshlangan. Tekshiruv davomida viza rasmiylashtirish jarayonida ko‘plab qoidabuzarliklar aniqlangan.
Hozirda tergov organlari sobiq diplomatga tegishli qiymati qariyb 3 million yevroga baholanayotgan mol-mulklarni ham o‘rganmoqda. Papadia esa ushbu mablag‘larni meros orqali olganini bildirgan.
