Eron Mojtabo Xomanaiyning jarohatlari haqida ilk bor ma’lumot berdi
AQSh davlat rahbarining qiyofasi buzilganini da'vo qildi.
Eron rasmiylari mamlakatning oliy rahbari Mojtabo Xomanaiyning jarohatlari tafsilotlarini ilk bor ommaga oshkor qildi. Bu haqda Al Arabiya xabar berdi.
Hukumat vakillariga ko‘ra, 28-fevral kuni Isroil va AQSh tomonidan amalga oshirilgan havo hujumi chog‘ida Mojtabo Xomanaiy zarba to‘lqini oqibatida yerga yiqilgan va natijada tizza hamda bel qismida jarohatlar olgan. Shuningdek, quloq orqasida yengil kesma ham qayd etilgan.
Eron rasmiylari uning belidagi jarohat allaqachon tuzalganini, tizza qismidagi jarohat esa tez orada sog‘ayishi kutilayotganini ma’lum qilgan. Quloq orqasidagi yengil jarohat esa tashqi ko‘rinishda sezilmas darajada ekanligi bildirilgan.
Oliy Rahbar devoni vakillari Mojtabo Xomanaiyning sog‘lig‘i barqaror ekani, u davlat ishlari va tegishli jarayonlarni nazorat qilishda davom etayotganini ta’kidlagan.
Shu bilan birga, AQSh Mudofaa vaziri Pit Xegset Mojtabo Xomanaiyning " ehtimol, qiyofasi buzilgan" ekanligini aytgan.U o'z bayonotini Mojtaboning video yoki audio yozuvi yo'qligini ta'kidlagan. "Menimcha, siz nima uchunligini bilasiz", deb qo'shimcha qilgan AQSh Mudofaa vaziri. O'z navbatida, AQSh prezidenti Donald Tramp Mojtabo Xomanaiyning o'lganligi ehtimolini istisno etmagan
AQSh tomonidan bildirilgan ushbu da’volar Eron tomonidan rad etilib, rasmiy Tehron vakillari oliy rahbarning holati bo‘yicha xavotirga asos yo‘qligini qayd etgan.
