Jizzax va Surxondaryo viloyati hokimlariga yangi o‘rinbosarlar tayinlandi
Dilmurod Xudayshukurov Jizzax viloyati hokimi o‘rinbosari, Oybek Ashurov esa Surxondaryo viloyati hokimi o‘rinbosari bo‘ldi.
Jizzax va Surxondaryo viloyatlarida hokimlarning yoshlar siyosati,ijtimoiy rivojlantirish va ma’naviy-ma’rifiy ishlar bo‘yicha o‘rinbosarlari lavozimiga yangi tayinlovlar amalga oshirildi.
Jizzax viloyati hokimligida o‘tkazilgan yig‘ilishda tashkiliy masala ko‘rildi. Unda Xudayshukurov Dilmurod Xolmurodovich Jizzax viloyati hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari lavozimiga tayinlandi.
Qayd etilishicha, u mazkur tayinlovga qadar Jizzax viloyati hokimligi tashkiliy-kadrlar guruhi rahbari lavozimida faoliyat yuritgan.
Shuningdek, Oybek Ashurov Surxondaryo viloyati hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari lavozimiga tasdiqlandi.
Oybek Ashurov 1988-yilda Sherobod tumanida tug‘ilgan. U 2011-yilda O‘zbekiston Respublikasi Ichki ishlar vazirligi akademiyasini tamomlagan bo‘lib, mutaxassisligi huquqshunoslik yo‘nalishiga ixtisoslashgan. Mehnat faoliyati davomida Sherobod va Sho‘rchi tumanlari hokimliklarida turli lavozimlarda, jumladan hokim o‘rinbosari sifatida ishlagan.
Shuningdek, Surxondaryo viloyati hokimligi ijro nazorati bo‘limi boshlig‘i lavozimida ham faoliyat yuritgan. Mazkur lavozimga qadar u Surxondaryo viloyati hokimligi ijro apparati rahbari sifatida faoliyat yuritib kelgan.
Ma’lumot uchun, Surxondaryo viloyati hokimining avvalgi o‘rinbosari Ilhom Saparov Jarqo‘rg‘on tumani hokimi etib tayinlangan.
Abdullayeva Shaxrizoda
