Mamlakatlar hantavirusga qarshi tayyor turishi kerak — JSST
Hozirda 9 ta tasdiqlangan infeksiya holati qayd etilgan, 3 kishi vafot etgan.
Jahon sog‘liqni saqlash tashkiloti (JSST) rahbari Tedros Adhanom Gebreyesus mamlakatlarni hantavirus infeksiyasining yangi holatlariga tayyor turishga chaqirdi. Bu haqda The Guardian xabar berdi.
Uning ma’lum qilishicha, MV Hondius kruiz kemasida qayd etilgan avj olishdan so‘ng hozirgacha 9 ta laboratoriya tasdiqlangan holat aniqlangan, ulardan 3 tasi o‘lim bilan yakunlangan.
JSST bosh direktori so‘zlariga ko‘ra, hozircha keng miqyosli epidemiya belgilariga oid dalillar mavjud emas. Biroq virusning 6–8 haftagacha davom etishi mumkin bo‘lgan uzoq inkubatsiya davri sababli, yangi holatlar qayd etilishi ehtimoli saqlanib qolmoqda.
Tedros Adhanom Gebreyesus mamlakatlarga JSST tavsiyalariga qat’iy rioya qilish, jumladan 42 kunlik kuzatuv va yuqtirgan shaxslar bilan aloqada bo‘lganlarni doimiy monitoring qilish zarurligini ta’kidlagan.
Shuningdek, u Ispaniya hukumati va tegishli xizmatlarga tezkor evakuatsiya va muvofiqlashtirilgan chora-tadbirlar uchun minnatdorlik bildirgan.
JSSTga ko‘ra, hantavirus odatda kemiruvchilar orqali yuqadi va odamdan odamga yuqishi kam uchraydi. Virusning Andes shtammi bilan bog‘liq 9 ta holat tasdiqlangan.
