O‘zbekistonda qishloq xo‘jaligi korxonalariga dizel yonilg'isi uchun subsidiya beriladi

O‘zbekistonda ayrim qishloq xo‘jaligi korxonalariga dizel yonilg‘isi xarajatlarini qoplash uchun subsidiya ajratiladi. Bu Prezident farmonida belgilandi, deya xabar bermoqda "Huquqiy axborot" Telegram-kanali.

 

Hujjatga ko‘ra, 2026-yil 1-apreldan 1-iyulgacha qishloq xo‘jaligi korxonalari tomonidan birja orqali xarid qilingan har bir tonna dizel yoqilg‘isi qiymatining 13 million so‘mdan oshgan qismi uchun subsidiya beriladi. Bunda subsidiya miqdori 2 million so‘mdan oshmaydi.

 

Mazkur mablag‘lar respublika byudjeti hisobidan Agrar sohada to‘lovlar agentligi (Agentlik) orqali ajratilishi ko‘zda tutilgan.

 

Farmonga muvofiq, 2026-yil 1-sentyabrdan boshlab Qishloq xo‘jaligini davlat tomonidan qo‘llab-quvvatlash jamg‘armasining ayrim subsidiya ajratish vakolatlari Agentlikka o‘tkaziladi.

 

Jumladan, qishloq xo‘jaligi subyektlariga o‘z mablag‘lari va tijorat banklari kreditlari hisobidan yetishtirilgan paxta xomashyosini birjada sotishda rasmiylashtirilgan elektron hisobvaraq-faktura qiymatining bir qismini qoplash bo‘yicha subsidiyalar ajratiladi.

 

Shuningdek, paxta-to‘qimachilik klasterlari hamda ip-kalava ishlab chiqarish zanjiriga ega to‘qimachilik korxonalariga o‘z mablag‘lari hisobidan xarid qilingan paxta xomashyosi qiymatining bir qismini qoplash mexanizmi ham Agentlik vakolatiga o‘tkaziladi.