Prezident Shavkat Mirziyoyev Braziliya TIV rahbarini qabul qildi
Uchrashuvda ikki davlat o‘rtasidagi siyosiy, iqtisodiy va tarmoq hamkorligini yangi bosqichga olib chiqish, qo‘shma loyihalarni kengaytirish hamda Hukumatlararo komissiya tuzish masalalari ko‘rib chiqildi.
Prezident Shavkat Mirziyoyev 12-may kuni O‘zbekistonga tashrif bilan kelgan Braziliya Federativ Respublikasi tashqi ishlar vaziri Mauro Vieyrani qabul qildi.
Uchrashuv avvalida mehmon O‘zbekiston rahbariga Braziliya Prezidenti Luis Inasiu Lula da Silvaning samimiy salomi va ezgu tilaklarini yetkazdi.
Suhbat davomida O‘zbekiston va Braziliya o‘rtasidagi munosabatlarni yanada mustahkamlash hamda ko‘p qirrali hamkorlikni sifat jihatidan yangi bosqichga olib chiqish masalalari muhokama qilindi.
Oliy darajadagi tizimli siyosiy muloqotni yo‘lga qo‘yish, parlamentlararo aloqalarni faollashtirish va ikki tomonlama hamkorlik mexanizmlarini kengaytirish muhimligi ta’kidlandi.
Tomonlar savdo-iqtisodiy aloqalarni rivojlantirish, o‘zaro savdo hajmini oshirish hamda kimyo, elektrotexnika, farmatsevtika va sanoatning boshqa yo‘nalishlarida qo‘shma loyihalarni amalga oshirish masalalariga alohida e’tibor qaratdilar.
Shuningdek, qishloq xo‘jaligi, seleksiya, turizm, sport va boshqa istiqbolli sohalarda hamkorlikni kengaytirish imkoniyatlari ko‘rib chiqildi.
Uchrashuv yakunida Hukumatlararo komissiya tashkil etish taklifi qo‘llab-quvvatlandi.
Tomonlar xalqaro va mintaqaviy dolzarb masalalar yuzasidan ham fikr almashdilar hamda bo‘lajak hamkorlik tadbirlari rejasini muhokama qildilar.
