O‘zbekistonda “SOCAR” kompaniyasining vakolatxonasi ochiladi
Prezident Shavkat Mirziyoyev “SOCAR” va “British Petroleum” kompaniyalari rahbariyati bilan energetika va neft-gaz sohasidagi hamkorlikni rivojlantirish rejalarini muhokama qildi.
Prezident Shavkat Mirziyoyev 13-may kuni “Oʻzbekiston energetika haftaligi – 2026” forumida ishtirok etish uchun O'zbekistonga tashrif buyurgan SOCAR bosh direktori Ravshan Najaf hamda British Petroleum kompaniyasi rahbariyati vakillari Ariel Flores va Jovanni Kristofolini qabul qildi.
Uchrashuvda energetika va neft-gaz sohasida dunyoning yetakchi kompaniyalari hisoblangan “SOCAR” hamda “British Petroleum” bilan o‘zaro manfaatli hamkorlikni yanada kengaytirish istiqbollari muhokama qilindi.
Muloqot davomida energetika sohasidagi hamkorlik izchil rivojlanayotgani mamnuniyat bilan qayd etildi. Xususan, “SOCAR” kompaniyasi Ustyurt platosidagi uglevodorod konlarini o‘zlashtirish loyihasida O‘zbekistonning muhim sheriklaridan biri ekani ta’kidlandi. Shu bilan birga, kompaniyaning O‘zbekistondagi vakolatxonasini ochish to‘g‘risida qaror qabul qilingani ma’lum qilindi.
Mazkur yirik loyihaga “British Petroleum” kompaniyasining qo‘shilgani yuqori baholandi.
Tomonlar uglevodorod xomashyosini qidirish va qazib olish, uni chuqur qayta ishlash, neft va neft mahsulotlarini uzoq muddatli yetkazib berishni yo‘lga qo‘yish hamda tarmoq uchun malakali mutaxassislar tayyorlash bo‘yicha qo‘shma loyihalarni ilgari surish masalalariga alohida e’tibor qaratdilar.
Uchrashuv davomida Ravshan Najaf davlatimiz rahbariga 2027-yilda O‘zbekiston va Ozarbayjonda yoshlar o‘rtasidagi U-20 jahon chempionatini o‘tkazishga tayyorgarlik ko‘rish jarayonidagi ko‘mak uchun minnatdorlik bildirdi.
