Prezident Shavkat Mirziyoyev BMT Bosh kotibi o'rinbosari bilan uchrashuv o‘tkazdi
Uchrashuvda reproduktiv salomatlik, gender tenglik va demografik barqarorlik sohalaridagi loyihalarni kengaytirish masalalariga alohida e’tibor qaratildi.
Prezident Shavkat Mirziyoyev 13-may kuni O'zbekistonga rasmiy tashrif bilan kelgan Birlashgan Millatlar Tashkiloti Bosh kotibining o‘rinbosari, Aholishunoslik jamg‘armasi (UNFPA) ijrochi direktori Diyene Keytani qabul qildi.
Uchrashuv avvalida mehmon davlat rahbariga BMT Bosh kotibi Antoniu Guterrishning samimiy salomlari va ezgu tilaklarini yetkazdi.
Suhbat davomida O‘zbekiston va UNFPA o‘rtasidagi hamkorlikning bugungi holati hamda uni yanada rivojlantirish istiqbollari muhokama qilindi.
Keyingi yillarda tomonlar o‘rtasidagi hamkorlik sifat jihatidan yangi bosqichga ko‘tarilgani ta’kidlandi. Xususan, reproduktiv salomatlikni mustahkamlash, gender tenglikni ta’minlash, demografik barqarorlikni qo‘llab-quvvatlash yo‘nalishlarida muhim loyihalar amalga oshirilmoqda. Jamg‘arma mamlakat tarixidagi birinchi aholi va qishloq xo‘jaligini ro‘yxatga olish jarayonida ham faol ishtirok etdi.
Shuningdek, ona va bola salomatligini yaxshilash, yosh oilalarni qo‘llab-quvvatlash hamda xotin-qizlarning huquq va imkoniyatlarini kengaytirish borasida erishilgan natijalar alohida qayd etildi.
Uchrashuv yakunida hamkorlikni yanada kengaytirish, yangi qo‘shma tashabbuslarni amalga oshirish hamda O‘zbekistonda va xalqaro maydonda yuqori darajadagi tadbirlarni tashkil etish bo‘yicha kelishuvga erishildi.
