Qashqadaryoda ekologiyaga zarar yetkazgan korxonaga qariyb 11 milliard so‘m kompensatsiya belgilandi

Qashqadaryodagi Muborak gazni qayta ishlash zavodiga ekologik qonunbuzarliklar sabab qariyb 11 milliard so‘m qo‘shimcha kompensatsiya belgilandi. Bu haqda Ekologiya va iqlim o‘zgarishi milliy qo‘mitasi xabar berdi.

 

Ma’lum qilinishicha, zavod hududida qurilish va boshqa turdagi chiqindilar noqonuniy joylashtirilgan. Bu esa atrof-muhitga salbiy ta’sir ko‘rsatib, chiqindilardan hosil bo‘layotgan chang zarralari atmosfera havosining ifloslanishiga sabab bo‘layotgani qayd etilgan.

 

Shuningdek, zararli gazlarni yoqish jarayonida atmosfera havosiga oltingugurt, uglerod va azot oksidlari belgilangan me’yorlardan ortiq miqdorda chiqarilgani aniqlangan.

 

Ishlab chiqarish jarayonida gazni tozalashdan hosil bo‘lgan oqova suvlar neft mahsulotlari aralashgan holda ochiq maydonlarga tashlanayotganligi ma’lum bo‘ldi.

 

Holat yuzasidan korxonaga 10 milliard 834 million so‘m miqdorida qo‘shimcha kompensatsiya belgilandi hamda bajarilishi majburiy bo‘lgan 7 banddan iborat ko‘rsatma berildi. To‘plangan hujjatlar sudga yuborilgan.

 

Avvalroq Surxondaryoning Boysun tumanida 23-aprel kuni daryoga neft aralash suyuqlik oqib ketgani haqida xabar berilgandi. Hodisa Surxan Gas Chemical Operating Company MChJ qo‘shma korxonasiga qarashli quduqda yuz bergani aniqlangan. 2-may kuni kuchli sel sabab xandaq buzilishi oqibatida yana neft aralash suyuqlik sizib chiqdi.

 

Holat yuzasidan atrof-muhitga yetkazilgan zarar miqdorini aniqlash, sabab va omillarni o‘rganish hamda mas’ul subyekt, jumladan Surxan Gas Chemical Operating Company faoliyatiga huquqiy baho berish bo‘yicha tekshiruv ishlari olib borilayotgani ma’lum qilingandi.