Surxondaryoda suv havzalari neftdan tozalanmoqda
Neft oqishi yuzasidan Surxan Gas Chemical Operating Company faoliyatiga huquqiy baho berish bo‘yicha tekshiruv ishlari olib borilmoqda.
Surxondaryo viloyatida neft bilan ifloslangan suv havzalari tozalanmoqda. Bu haqda viloyat Ekologiya va iqlim o‘zgarishi bosh boshqarmasi matbuot xizmati xabar berdi.
Boysun tumanida 23-aprel kuni daryoga neft aralash suyuqlik oqib ketgani haqida xabar berilgandi. Hodisa Surxan Gas Chemical Operating Company MChJ qo‘shma korxonasiga qarashli quduqda yuz bergani aniqlangan. 2-may kuni kuchli sel sabab xandaq buzilishi oqibatida yana neft aralash suyuqlik sizib chiqdi.
O‘rganishlarga ko‘ra, tarkibida neft bo‘lgan aralashma Boysun tumanidagi “Xongaronsoy” hududidan oqim bo‘ylab Bandixon va Qumqo‘rg‘on tumanlariga, “Surxon” daryosiga, shuningdek Jarqo‘rg‘on tumanidagi “Zang” kanali orqali Angor tumanigacha yetib borgan.
Rasmiylarga ko‘ra, holat viloyat Ekologiya va iqlim o‘zgarishi boshqarmasi hamda boshqa tegishli tashkilotlar tomonidan nazoratga olingan. Jarqo‘rg‘on tumanidagi “Zang” kanalida va unga tutash hududlarda neft mahsulotlarini ushlab qolish uchun maxsus to‘siqlar o‘rnatilib, suv yuzasidagi neft qatlamini mexanik usulda yig‘ib olish ishlari olib borilmoqda. Ifloslangan suvni ajratish va zararsizlantirish uchun maxsus texnikalar jalb etilgan.
Shuningdek, Boysun tumanida neft aralashmasi sizib chiqayotgan hududdagi sel yo‘llari yopilib, oqim lokalizatsiya qilingani bildirilgan.
Mazkur holat yuzasidan atrof-muhitga yetkazilgan zarar miqdorini aniqlash, sabab va omillarni o‘rganish hamda mas’ul subyekt, jumladan Surxan Gas Chemical Operating Company faoliyatiga huquqiy baho berish bo‘yicha tekshiruv ishlari olib borilmoqda.
