Toshkentda bank xodimlari mijozning 500 ming dollar omonat pulini talon-toroj qildi
Ular omonat pulini soxta hujjatlar asosida qo‘lga kiritgan. Holat yuzasidan tergov harakatlari olib borilmoqda.
Toshkent shahrining Uchtepa tumanida tijorat banki xodimlari tomonidan yirik miqdordagi mablag‘ni o‘zlashtirish holati aniqlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti ma’lum qildi.
Qayd etilishicha, departamentning Uchtepa tumani bo‘limi tomonidan o‘tkazilgan tergovga qadar tekshiruv davomida tijorat bankining mas’ul shaxslari fuqaro I.M.ning bank omonatiga qo‘yilgan 500 ming AQSH dollarini soxta hujjatlar asosida qo‘lga kiritib, o‘zlashtirish yo‘li bilan talon-toroj qilgani aniqlangan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) hamda 228-moddasi (hujjatlar, shtamplar, muhrlar, blankalarni tayyorlash, qalbakilashtirish, sotish yoki ulardan foydalanish) bilan jinoyat ishi qo‘zg‘atilgan.
Hozirda holat yuzasidan tergov harakatlari olib borilmoqda.
