Toshkentda shaxsiy foto va videolarni tarqatish bilan tahdid qilgan shaxs qo‘lga olindi
U avvalroq jabrlanuvchidan 450 dollargacha pul olgan.
Toshkent shahrining Olmazor tumanida shaxsiy foto va videolarni tarqatish bilan tahdid qilib, pul talab qilib kelgan shaxs qo‘lga olindi. Bu haqda poytaxt IIB xabar berdi.
Ma’lum qilinishicha, fuqaro huquqni muhofaza qiluvchi organlarga murojaat qilib, avvaldan tanish bo‘lgan shaxs uzoq vaqt davomida uni tahdid va bosim ostida ushlab kelayotganini bildirgan.
Gumonlanuvchi jabrlanuvchining sir saqlanishi lozim bo‘lgan shaxsiy foto va videolarini ijtimoiy tarmoqlarda tarqatib yuborish bilan qo‘rqitib, muntazam ravishda pul talab qilgan.
Qayd etilishicha, u avvalroq jabrlanuvchidan 100 dollardan 450 dollargacha bo‘lgan mablag‘larni olib kelgan. Shunga qaramasdan, yana pul talab qilishni davom ettirgan.
Tezkor tadbir davomida gumonlanuvchi Olmazor tumanidagi “Nukus” kinoteatri oldida fuqarodan 500 AQSH dollarini olayotgan vaqtida ashyoviy dalillar bilan ushlangan.
Huquqni muhofaza qiluvchi organlar ma’lumotiga ko‘ra, ushlangan shaxs muqaddam O‘zbekiston Respublikasi Jinoyat kodeksining 277-moddasi bilan sudlangan bo‘lgan.
Holat yuzasidan Olmazor tumani ichki ishlar organlari faoliyatini muvofiqlashtirish boshqarmasi tergov bo‘limi tomonidan O‘zbekiston Respublikasi Jinoyat kodeksining 165-moddasining ikkinchi qismi bilan jinoyat ishi qo‘zg‘atilib, gumonlanuvchiga nisbatan qamoq ehtiyot chorasi qo‘llanilgan.
