Toshkentda avtobus va Tracker to‘qnashishi oqibatida 3 kishi jarohatlandi
Hodisaga Tracker haydovchisining keskin burilishi sabab bo'lgan.
Toshkent shahrida 2026-yil 14-may kuni soat 08:20 atrofida “Yutong” rusumli avtobus va Tracker rusumli transport vositasi ishtirokida yo‘l-transport hodisasi sodir bo‘ldi. Bu haqda “Toshshahartransxizmat” xabar berdi.
Ma’lum qilinishicha, “7-Avtobus saroyi” filiali tasarrufidagi, 69-sonli yo‘nalishda harakatlanayotgan “Yutong” avtobusi Yakkasaroy tumani Shota Rustaveli ko‘chasi bo‘ylab “BRT” maxsus harakat tasmasida harakatlanib kelgan.
Avtobus Shota Rustaveli va Yakkasaroy ko‘chalari kesishmasiga yaqinlashgan vaqtda Tracker rusumli avtomobil haydovchisi keskin chapga burilgan. Natijada transport vositalari to‘qnashuvi yuz bergan.
YTH oqibatida avtobus yo‘lovchisi, Tracker haydovchisi hamda uning yo‘lovchisi tan jarohati olib, tibbiy yordam uchun 16-sonli Respublika shoshilinch tibbiy yordam klinik ilmiy markaziga murojaat qilgan.
Dastlabki ma’lumotlarga ko‘ra, hodisada Tracker haydovchisining harakati aybli deb topilgan.
Yo‘l-transport hodisasi Toshkent shahar IIBB Yo‘l harakati xavfsizligi boshqarmasi tomonidan belgilangan tartibda rasmiylashtirilgan.
Mutasaddilar haydovchilardan yo‘l harakati qoidalariga qat’iy rioya qilish va harakat davomida ehtiyotkorlikni oshirishni so‘ragan.
