Toshkentda ilk marotaba “Musiqa ta’limi: jahon miqyosida yagona maydon sari” xalqaro forumi o‘tkaziladi
Forumda 200 nafarga yaqin xorijiy va mahalliy ishtirokchilar qatnashishi kutilmoqda.
2026-yilning 18–20-may kunlari ilk marotaba Toshkent shahrida “Musiqa ta’limi: jahon miqyosida yagona maydon sari” mavzusida yirik xalqaro forum bo‘lib o‘tadi. Unda 200 nafarga yaqin xorijiy va mahalliy ishtirokchilar qatnashishi kutilmoqda.
Forumda Turkiya, Rossiya, Ozarbayjon, Qozog‘iston, Qirg‘iziston, Xitoy, Koreya, AQSh, Fransiya, Indoneziya, Buyuk Britaniya, Yaponiya, Kanada, Italiya, Vengriya va Tojikiston davlatlaridan nufuzli mehmonlar, xorijiy oliy ta’lim muassasalari rektorlari va prorektorlari, professorlar va PhD olimlar, dekanlar, etnomuzikologlar, tadqiqotchilar, madaniyat markazlari rahbarlari, shuningdek, o‘qituvchilar hamda talabalar ishtirok etadi.
Mazkur xalqaro forum zamonaviy musiqa ta’limini xalqaro standartlar asosida rivojlantirish, milliy musiqa merosini jahon ta’lim maydoniga integratsiya qilish, innovatsion pedagogik yondashuvlarni ommalashtirish va ta’lim tizimiga raqamli texnologiyalarni keng joriy etishga qaratilgani bilan alohida ahamiyat kasb etadi.
Forum doirasida “Madaniyat ta’limida sun’iy intellektning ahamiyati” mavzusida xalqaro ilmiy-amaliy konferensiya ham tashkil etiladi. Ushbu konferensiya madaniyat va san’at ta’limi tizimida sun’iy intellekt texnologiyalarini joriy etish, raqamli transformatsiya jarayonlarini jadallashtirish hamda innovatsion o‘qitish metodlarini amaliyotga tatbiq etish masalalariga bag‘ishlanadi.
Tadbir davomida 80 dan ortiq ilmiy ishlar, innovatsion loyihalar va amaliy tadqiqotlar taqdim etiladi.Forum yakunlari bo‘yicha xalqaro hamkorlik memorandumlari, qo‘shma ta’lim dasturlari va ilmiy loyihalarni amalga oshirish bo‘yicha kelishuvlarni imzolash rejalashtirilgan.
“Musiqa ta’limi: jahon miqyosida yagona maydon sari” xalqaro forumi mamlakatda musiqa va madaniyat ta’limini yangi bosqichga olib chiqish, innovatsion va raqamli yondashuvlarni keng joriy etish, xalqaro akademik hamkorlikni mustahkamlash hamda yosh iste’dodlarni qo‘llab-quvvatlashda muhim ahamiyat kasb etadi.
