Janubiy Koreyaga ishga yuborish uchun 400 ming dollardan ortiq mablag‘ni o‘zlashtirganlar ushlandi
Surxondaryoda 6 ta viloyatdan 63 nafar fuqaroni chuv tushirgan shaxslar aniqlandi.
Bosh prokuratura huzuridagi Departamentning Surxondaryo viloyati boshqarmasi tomonidan o‘tkazilgan tergovga qadar tekshiruvda Janubiy Koreyaga ishga yuborish bilan bog‘liq yirik firibgarlik holati fosh etildi.
Ma’lum qilinishicha, “K.M.” nodavlat ta’lim muassasasi ta’sischisi X.Sh.(muqaddam sudlangan) va boshqalar oldindan o‘zaro til biriktirgan holda 6 ta viloyatda yashovchi 63 nafar fuqaroning ishonchiga kirgan.
Ular Janubiy Koreyaga ishga yuborishni va’da qilib, fuqarolardan jami 408,8 ming AQSH dollarini firibgarlik yo‘li bilan qo‘lga kiritgan.
Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilgan bo‘lib, hozirda tergov harakatlari olib borilmoqda.
