Farg‘onada tog‘a va jiyan narkosavdogarlar qo‘lga olindi
Tezkor tadbirda jami 5 kg gashish olingan bo‘lib, mazkur moddalar qo‘shni davlatdan olib kirilgan.
Farg‘onada qariyb 5 kg gashish aylanmasiga chek qo‘yildi. Bu haqda Zamon.uz’ga DXX ma’lum qildi.
Ma’lum qilinishicha, Qo‘qon shahrida yashovchi, 2002 yilda tug‘ilgan fuqaro boshqaruvida bo‘lgan “Kobalt” rusumli avtomashina Uchko‘prik tumani hududida tekshirilgan.
Natijada, uning salonida 4 kg 41 gr “gashish” moddasi borligi ma’lum bo‘ldi. Shuningdek, mazkur fuqaroning uyidan ham 867 gr “gashish” moddasi olindi.
Tergovga qadar tekshiruv davomida, ushbu giyohvandlik vositalari uning 1980 yilda tug‘ilgan tog‘asiga tegishli ekanligi aniqlanib, u ham qo‘lga olindi.
Aniqlanishicha, ushbu giyohvand modda qo‘shni respublikadan olib kelingan.
Hozirda mazkur shaxslarga nisbatan Jinoyat Kodeksining 246-moddasi (kontrabanda) va 273-moddasi (giyohvandlik vositalari, ularning analoglari yoki psixotrop moddalarni o‘tkazish...) bilan jinoyat ishi qo‘zg‘atilib, “qamoq” ehtiyot chorasi qo‘llanildi. Tergov harakatlari olib borilmoqda.
