Saida Mirziyoyeva Buxorodagi bog‘cha va poliklinikalarni ko‘zdan kechirdi
Buxoroda o‘tgan asrda ochilgan bog‘cha qayta qurilib, ikki yil ichida 36 ta poliklinika rekonstruksiya qilinadi.
Saida Mirziyoyeva Buxorodagi bog‘cha va poliklinikalarini borib ko‘rdi.
Prezident administratsiyasi rahbarining bildirishicha, Buxoroda ko‘zdan kechirilgan bog‘cha va poliklinikalarning ahvoli nihoyatda achinarli bo‘lib, ularni zudlik bilan ta’mirlash talab etiladi.
“Bu bolalarimizning kelajagi uchun zarur. 1977-yilda ochilgan 21-sonli bolalar bog‘chasi qaytadan quriladi, 46 ming nafar odamga xizmat ko‘rsatadigan 9-sonli poliklinika uchun esa yangi bino barpo etiladi”, dedi Saida Mirziyoyeva.
Ma’lum qilinishicha, hozirda mazkur muassasa 1972-yilda qurilgan, tibbiy standartlarga javob bermaydigan binoda – kam ta’minlangan fuqarolar uchun mo‘ljallangan yotoqxonada joylashgan. Ushbu bino ham to‘liq ta’mirlanadi va u yerda yashovchilarning sharoitlari yaxshilanadi.
Bundan tashqari, ikki yil ichida viloyatning chekka tumanlarida joylashgan yana 36 ta poliklinikani rekonstruksiya qilish ko‘zda tutilgan.
