Toshkentda narkolaboratoriya aniqlandi
Manzildan “Pregabalin”, “Tropikamid”, 16 kg “Trilon-B” kabi vositalar, prekursorlar, katta miqdordagi kapsula va flakonlar olindi.
Chilonzorda narkolaboratoriya tashkil qilgan shaxs qo‘lga olindi. Bu haqda DXX xabar berdi.
Ma’lum qilinishicha, Toshkent shahrida o‘tkazilgan tezkor tadbirda 1996 yilda tug‘ilgan shaxs boshqaruvidagi “Spark” avtomashinasi Chilonzor tumanida to‘xtatilib, tekshirildi.
Natijada uning salonida 15 dona kapsulada “Pregabalin” kuchli ta’sir qiluvchi moddasi borligi ma’lum bo‘ldi.
So‘ngra, tezkor tadbir davom ettirilib, ushbu dorilarni sotgan 1991 yilda tug‘ilgan fuqaro ham qo‘lga olindi.
Aniqlanishicha, mazkur fuqaro Chilonzor tumanidagi xonadonda narkolaboratoriya tashkil qilgan bo‘lib, ushbu manzildan 955 gr va 538 dona “Pregabalin”, 227 gr va 28 dona “Tropikamid”, 16 kg “Trilon-B” hamda sintetik narkotiklar tayyorlashda foydalaniladigan prekursorlar, katta miqdordagi kapsula va flakonlar olindi.
Hozirda ushbu shaxslarga nisbatan jinoyat ishi qo‘zg‘atilib, tergov harakatlari olib borilmoqda.
