BAA Hormuzni aylanib o‘tuvchi neft quvurini ishga tushirmoqchi

Birlashgan Arab Amirliklari Hormuz bo‘g‘oziga bog‘liqlikni kamaytirish maqsadida yangi neft quvuri qurilishini jadallashtirishga qaror qildi. Bu haqda Reuters xabar berdi.

 

Abu Dhabi Media Office ma’lumotiga ko‘ra, Abu-Dabi valiahdi shayx Xolid bin Muhammad bin Zoid ADNOC davlat neft kompaniyasiga West-East Pipeline loyihasini tezlashtirish bo‘yicha topshiriq bergan. Hozirda quvur qurilishi davom etmoqda va uni 2027-yilga qadar ishga tushirish rejalashtirilgan.

 

Yangi loyiha orqali Fujayra portidan neft eksport qilish quvvati ikki baravarga oshiriladi. Bu esa BAAga neftni Hormuz bo‘g‘ozidan o‘tkazmasdan, Ummon ko‘rfazi orqali jahon bozoriga chiqarish imkonini kengaytiradi.

 

Hozirda mamlakatdagi Hab–Fujairah (ADCOP) neft quvuri kuniga 1,8 million barrelgacha neft tashish quvvatiga ega. Mazkur quvur Fors ko‘rfazidagi keskin vaziyat sharoitida BAA uchun strategik ahamiyat kasb etmoqda.

 

 Fors ko‘rfazi davlatlari orasida faqat BAA va Saudiya Arabistoni Hormuz bo‘g‘ozini chetlab o‘tuvchi eksport yo‘nalishlariga ega.

 

Fevral oyi oxirida AQSH va Isroilning Eronga qarshi zarbalaridan keyin Tehron Hormuz bo‘g‘ozidagi harakatni amalda cheklagan. Odatda jahon neftining qariyb beshdan biri aynan shu yo‘lak orqali tashiladi.

 

So‘nggi oylarda mintaqadagi tankerlarga hujumlar va neft infratuzilmalariga zarbalar ham qayd etilgan. Shu fonda BAA eksport xavfsizligini ta’minlash uchun muqobil yo‘nalishlarni kuchaytirishga urinmoqda.