Metroda rekord ko‘rsatkich: 8-may kuni 1 mlndan ortiq yo‘lovchi tashildi
Metro xizmatlaridan eng ko‘p haftaning payshanba va juma kunlari foydalanilmoqda.
2026-yil may oyida Toshkent metropoliteni xizmatlaridan foydalanuvchilar soni o‘tgan yilning shu davriga nisbatan sezilarli darajada oshdi. Bu haqda “Toshkent metropoliteni” DUK xabar berdi.
Ma’lumotlarga ko‘ra, 2025-yil 8-may kuni metrodan 986 ming 916 nafar yo‘lovchi foydalangan bo‘lsa, 2026-yil 7-may kuni bu ko‘rsatkich 1 million 105 ming 883 nafarga yetgan. Natijada yo‘lovchilar oqimi qariyb 12 foizga oshgan.
Shuningdek, 2025-yil 15-may kuni metro xizmatidan 953 ming 220 nafar fuqaro foydalangan bo‘lsa, 2026-yil 14-may kuni ushbu ko‘rsatkich 1 million 44 ming 736 nafarga yetib, 9,6 foizlik o‘sish qayd etilgan.
Metropolitenga ko'ra, 2026-yil 8-may kuni bir sutka davomida 1 million 117 ming 61 nafar yo‘lovchiga xizmat ko‘rsatilib, rekord natija qayd etilgan.
Qayd etilishicha, metro xizmatlaridan eng ko‘p haftaning payshanba va juma kunlari foydalanilmoqda.
