Olmaliqda mototsikl voyaga yetmagan piyodani urib ketdi
YTH oqibatida piyodaning oyog‘i juda jiddiy shikastlangani aytilmoqda.
Toshkent viloyatining Olmaliq shahrida mototsikl ishtirokida yo‘l-transport hodisasi sodir bo‘ldi. Bu haqda viloyat IIB YHXB xabar berdi.
Ma’lum qilinishicha, hodisa 14-may kuni soat taxminan 23:00 larda A.Temur ko‘chasida yuz bergan. 2003-yilda tug‘ilgan haydovchi S.F. mototsikl boshqarib ketayotgan vaqtda yo‘lni piyodalar uchun belgilanmagan joydan kesib o‘tayotgan 2011-yilda tug‘ilgan piyodani urib yuborgan.
Oqibatda piyoda turli tan jarohatlari olib, shifoxonaga yotqizilgan.
Tarqalgan videolarda esa uning o‘ng oyog‘i tizzaga yaqin qismi va chap tovon suyagi uzilib ketgani ko‘rinadi. Lekin rasmiy idora bunga aniqlik kiritmagan.
Holat yuzasidan Olmaliq shahar IIB tomonidan surishtiruv ishlari olib borilmoqda.
12-may kuni ham aynan shu ko'chada 26 yoshli haydovchi S .D. boshqaruvidagi avtomobil piyodalar o‘tish joyidan yo‘lni kesib o‘tayotgan ikki nafar 9 yoshli bolani urib yuborgandi. Hodisa oqibatida jabrlangan bolalardan biri og‘ir tan jarohatlari olib, shifoxonada vafot etgan. Ikkinchi bola esa tan jarohatlari bilan kasalxonaga yotqizilgan.
