O‘zbekiston Markaziy Osiyoda suv iste’moli bo‘yicha yetakchilikni saqlab qolmoqda
Keyingi o‘rinlarni Turkmaniston, Qozog‘iston, Tojikiston, Qirg‘iziston egallagan.
Markaziy Osiyoda suv resurslariga bosim ortib borayotgan bir sharoitda O‘zbekiston yillik 54,56 mlrd kub metr ko‘rsatkich bilan mintaqada eng yuqori umumiy suv iste’moliga ega davlat sifatida qayd etildi. Bu haqda Worldometer tahliliy platformasi e’lon qildi.
Ma’lumotlarga ko‘ra, O‘zbekiston mintaqa davlatlari orasida umumiy suv sarfi bo‘yicha birinchi o‘rinni egallab turibdi. Mutaxassislar bu holatni asosan qishloq xo‘jaligining keng ko‘lamda rivojlangani va irrigatsiya tizimlarining yuqori darajadagi suv iste’moli bilan izohlamoqda.
Reytingda ikkinchi o‘rinda Turkmaniston qayd etilgan bo‘lib, yillik suv iste’moli 27,9 mlrd kub metrni tashkil etadi. Qozog‘istonda bu ko‘rsatkich 22,77 mlrd kub metr, Tojikistonda 11,49 mlrd kub metr, Qirg‘izistonda esa qariyb 8 mlrd kub metrga teng.
Aholi jon boshiga hisoblanganda esa mintaqada eng yuqori ko‘rsatkich Turkmanistonga to‘g‘ri keladi — bir kishi kuniga o‘rtacha 15 445 litr suv iste’mol qiladi.
O‘zbekistonda bu ko‘rsatkich 4 778 litrni tashkil etadi. Tojikistonda 4 460 litr, Qirg‘izistonda 4 153 litr, Qozog‘istonda esa 3 397 litr qayd etilgan.
Mutaxassislar fikricha, ushbu raqamlar mintaqa davlatlari oldida suv resurslaridan samarali foydalanish, zamonaviy boshqaruv tizimlarini joriy etish hamda qishloq xo‘jaligini modernizatsiya qilish bo‘yicha dolzarb vazifalarni qo‘ymoqda.
