Samarqand–Buxoro yo‘lida haydovchi uxlab qolib, avtomobil ikkita yuk mashinasiga urildi
YTH oqibatida avtomobillarda yong‘in yuzaga keldi.
Samarqand viloyatining Paxtachi tumanida “FAV” va “Sinoturk Howo” rusumli yuk avtomobillari ishtirokida yo‘l-transport hodisasi yuz berdi. Bu haqda viloyat YHXB ma’lum qildi.
Ma’lumotlarga ko‘ra, hodisa 16-may kuni soat 04:30 atrofida “Boltali” MFY hududidan o‘tuvchi M-37 “Samarqand–Buxoro–Turkmanboshi” avtomobil yo‘lining 118-kilometrida sodir bo‘lgan.
Ma’lumotlarga ko‘ra, “FAV” rusumli avtomobil haydovchisi Samarqand–Navoiy yo‘nalishida harakatlanayotib uxlab qolgan va rul boshqaruvini yo‘qotgan. Oqibatda avtomobil yo‘l chetida to‘xtab turgan “Sinoturk Howo” yuk mashinasining chap tomoniga urilgan.
Shundan so‘ng transport vositasi harakatni to‘xtata olmay, oldinda to‘xtab turgan yana bir “Sinoturk Howo” yuk avtomobilining orqa qismiga kelib urilgan.
YTH oqibatida “FAV” hamda yuk avtomobillaridan birida yong‘in yuzaga kelgan. Yong‘in Favqulodda vaziyatlar boshqarmasi xodimlari tomonidan qisqa muddatda bartaraf etilgan.
Hodisa natijasida tan jarohati olganlar va halok bo‘lganlar qayd etilmagan.
Mazkur holat yuzasidan Paxtachi tumani IIB JXX YHXG tomonidan dastlabki surishtiruv ishlari olib borilmoqda.
Mutasaddilar haydovchilardan charchoq alomatlari sezilganda transport boshqarmaslik va yo‘l harakati qoidalariga qat’iy rioya qilishni so‘radi.
