Toshkentda 19 yoshli “Tracker” haydovchisi piyodani urib yubordi
Piyoda yo‘lning belgilanmagan qismidan o‘tayotgan vaqtda hodisa sodir bo‘lgan.
Toshkent shahrining Chilonzor tumanida piyoda ishtirokida yo‘l-transport hodisasi sodir bo‘ldi.
Toshkent shahar IIBB YHXB ma’lum qilishicha, joriy yilning 16-may kuni soat 01:00 atrofida Chilonzor tumani Bunyodkor shoh ko‘chasida, Oliy Majlis binosi qarshisida 2007-yilda tug‘ilgan haydovchi boshqaruvidagi “Tracker” rusumli avtomobil piyodani urib yuborgan.
Dastlabki ma’lumotlarga ko‘ra, 2007-yilda tug‘ilgan fuqaro yo‘lning belgilanmagan qismidan harakatlanib o‘tayotgan vaqtida hodisa yuz bergan.
Yo‘l-transport hodisasi oqibatida piyodaga shifokorlar tomonidan birinchi tez tibbiy yordam ko‘rsatilgan.
Hozirda mazkur holat yuzasidan Toshkent shahar IIBB YHXB tomonidan surishtiruv ishlari olib borilmoqda.
