Kanadada hantavirus infeksiyasi holati qayd etildi
Rossiya va Belarusda ham kasallik bilan bog‘liq holatlar aniqlangan.
Kanadaning Britaniya Kolumbiyasi provinsiyasi hukumati mamlakat fuqarolaridan birida hantavirus infeksiyasi aniqlanganini ma’lum qildi. Reuters agentligi xabariga ko‘ra, bemorda Andes virusi shtammi bo‘yicha test natijasi ijobiy chiqqan.
Ma’lum qilinishicha, fuqaro avvalroq hantavirus tarqalishi qayd etilgan kruiz kemasida bo‘lgan. Kema tark etilgach, erkak Britaniya Kolumbiyasining Viktoriya shahridagi shifoxonada tibbiy ko‘rikdan o‘tkazilgan.
Rossiya Fanlar akademiyasi akademigi, epidemiolog Gennadiy Onishchenko ma’lumotiga ko‘ra, 2026-yilda Atlantika okeanidagi kruiz kemasida qayd etilgan holatdan avval ham bir qator davlatlarda hantavirus infeksiyasi aniqlangan.
Xususan, Rossiyaning Volgabo‘yi hududi va Boshqirdistonida kasallik holatlari qayd etilgan. Shuningdek, AQSHning Arizona va Kaliforniya shtatlarida, Chili hamda Argentinada ham hantavirus bilan bog‘liq tasdiqlangan holatlar aniqlangan. Belarusda esa o‘tgan yil davomida 50 ta holat qayd etilgani ma’lum qilingan.
