O‘zbekiston Prezidenti Qozog‘iston rahbari bilan telefon orqali muloqot qildi
Suhbat avvalida O‘zbekiston yetakchisi Qozog‘iston Prezidentini tavallud kuni bilan tabrikladi.
Prezident Shavkat Mirziyoyev 17-may kuni Qozog‘iston Prezidenti Qasim-Jomart Toqayev bilan telefon orqali muloqot o‘tkazdi.
Suhbat avvalida O‘zbekiston yetakchisi Qozog‘iston Prezidentini tavallud kuni bilan samimiy tabriklab, unga mustahkam sog‘liq, baxt-saodat hamda qardosh Qozog‘iston xalqining tinch va farovon hayoti yo‘lidagi davlat faoliyatida ulkan muvaffaqiyatlar tiladi.
Muloqot davomida Turkiy davlatlar tashkilotining Turkistonda o‘tkazilgan norasmiy sammiti hamda undagi muzokaralar yuqori darajada tashkil etilgani va muvaffaqiyatli o‘tkazilgani alohida qayd etildi. Ushbu tadbirlar ishtirokchi davlatlar o‘rtasidagi hamkorlikni yangi bosqichga olib chiqqani ta’kidlandi.
Tomonlar O‘zbekiston va Qozog‘iston o‘rtasidagi yaxshi qo‘shnichilik, strategik sheriklik va ittifoqchilik munosabatlarini yanada mustahkamlash masalalarini muhokama qildilar.
Shuningdek, ikki davlat o‘rtasidagi hamkorlik barcha sohalarda izchil rivojlanayotgani mamnuniyat bilan qayd etildi. Yaqin istiqbolda o‘zaro tovar ayirboshlash hajmini 10 milliard dollarga yetkazish, investitsiya loyihalarini kengaytirish, energetika, transport, ekologiya hamda madaniy-gumanitar yo‘nalishlarda hamkorlikni kuchaytirish bo‘yicha ishlar olib borilayotgani ta’kidlandi.
Bo‘lajak Hukumatlararo komissiya yig‘ilishi va Hududlar rahbarlari kengashining birinchi uchrashuvi doirasida yangi iqtisodiy kun tartibini shakllantirish masalalariga alohida e’tibor qaratildi.
