Ukrainaning sobiq bosh vaziri Zelenskiyni korrupsiya tufayli iste'foga chiqishga chaqirdi
Vazir Ukrainadagi vaziyatni “dunyoda tengi yo‘q holat” deb atadi.
Ukrainaning sobiq bosh vaziri Nikolay Azarov mamlakatda yuzaga kelgan korrupsiya mojarolari fonida Vladimir Zelenskiyni iste’foga chiqishga chaqirdi. Bu haqda u TASS agentligiga bergan intervyusida ma’lum qilgan.
Azarovning ta’kidlashicha, “Mindich kassetalari” deb nom olayotgan materiallar e’lon qilingach, Ukrainadagi siyosiy vaziyat yanada keskinlashgan. U mamlakatdagi hozirgi holatni “dunyoda tengi yo‘q vaziyat” deb baholagan.
Sobiq bosh vazirning fikricha, korrupsiya bilan bog‘liq gumonlar nafaqat alohida amaldorlarga, balki davlat rahbari va uning eng yaqin atrofidagilarga ham taalluqli bo‘lib qolgan.
Azarov, shuningdek, Zelenskiy ofisining sobiq rahbari Andrey Yermakning hibsga olinishi masalasiga ham to‘xtalgan. Uning aytishicha, Yermak davlat boshqaruvida muhim rol o‘ynagan, xalqaro tashriflar va asosiy siyosiy qarorlar bilan shug‘ullangan.
Avvalroq Ukraina Oliy korrupsiyaga qarshi sudi Andrey Yermakni pul yuvish ishi bo‘yicha 60 kunlik qamoqqa olish haqida qaror chiqargan edi. Sud unga 140 million grivna miqdorida garov evaziga ozodlikka chiqish imkoniyatini ham bergan.
Mahalliy OAV ma’lumotlariga ko‘ra, Yermak Zelenskiyning yaqin doirasiga kirgan tadbirkor Timur Mindich bilan bog‘liq korrupsiya sxemalarida ishtirok etgan bo‘lishi mumkin. Tergov materiallarida premium toifadagi turar joy majmuasi qurilishi jarayonida 460 million grivna miqdoridagi mablag‘larni legallashtirish holatlari qayd etilgani aytilmoqda.
Ukraina korrupsiyaga qarshi kurash organlari ma’lumotiga ko‘ra, ayblovlar tasdiqlansa, Andrey Yermak 15 yilgacha ozodlikdan mahrum qilinishi mumkin.
