Andijonda “Energosavdo” yuristkonsulti 5 ming dollar pora bilan ushlandi
U elektr energiyasidan noto‘g‘ri foydalanish bo‘yicha hisoblangan zarar summasini kamaytirib berish evaziga pul talab qilgan.
Hududiy elektr tarmoqlari AJning “Energosavdo” filiali Andijon bo‘linmasi yetakchi yuristkonsultiga nisbatan jinoyat ishi qo‘zg‘atildi. Bu haqda DXX xabart berdi.
Ma’lum qilinishicha, u pishloq ishlab chiqarish faoliyati bilan shug‘ullanuvchi MCHJga nisbatan rasmiylashtirilgan dalolatnoma asosida elektr energiyasidan noto‘g‘ri foydalanish bo‘yicha hisoblangan 788,4 million so‘mlik moddiy zarar summasini “bartaraf etib berish” evaziga 5 ming AQSH dollari talab qilgan.
Joriy yilning 1-may kuni u so‘ralgan mablag‘ning 500 AQSH dollarini olgan.
Keyinchalik Davlat xavfsizlik xizmati hamda boshqa huquqni muhofaza qiluvchi organlar xodimlari hamkorligida o‘tkazilgan tezkor tadbir davomida yuristkonsult qolgan 4500 AQSH dollarini olayotgan vaqtida ashyoviy dalillar bilan ushlangan.
Hozirda mazkur shaxsga nisbatan jinoyat ishi qo‘zg‘atilib, tergov harakatlari olib borilmoqda.
