Germaniyalik sayyohga tarmashgan lo‘lilar hodisasi Toshkentda bo‘lgani aniqlandi
Samarqandga tegishli kadrlar montaj yordamida qo‘shilgani aniqlanib, Germaniyada bo‘lgan fuqaro bilan bog‘lanib tushuntirish olib borilgan.
Ijtimoiy tarmoqlarda Samarqandda bir guruh lo'lilarning germaniyalik sayyohga nisbatan nojo‘ya harakatlari aks etgan video keng muhokamalarga sabab bo‘ldi.
Mazkur holatga Ichki ishlar vazirligi Jamoat xavfsizligi departamenti oydinlik kiritdi.
Qayd etilishicha, o‘tkazilgan tekshiruv davomida videoda aks etgan voqea Samarqandda emas, balki Toshkent shahridagi Hazrati Imom majmuasi hududida sodir etilgani aniqlangan. Shuningdek, videodagi Samarqand shahri tarixiy obidalariga oid lavhalar montaj yordamida qo‘shilgani ma'lum qilindi.
Rasmiy ma'lumotlarga ko'ra, ushbu holat 2023-yilda sodir bo‘lgan. Videoda aks etgan voyaga yetmagan qizning shaxsiga aniqlik kiritilib, uning otasi — 1979-yilda tug‘ilgan Z.M. bilan profilaktik-tushuntirish ishlari olib borilgan. Unga farzandini qat’iy nazorat qilish va bunday holatlarning qayta takrorlanishiga yo'l qo'ymaslik bo'yicha ogohlantirish berilgan.
Shuningdek, yolg‘on аxborot tarqatib, jamoatchilik fikrini chalg'itishga urinishda gumoin qilingan fuqaro S.Sh.ning shaxsi ham aniqlangan. Ma’lum qilinishicha, u hozirda Germaniya hududida bo‘lib turibdi. Shu sababli u bilan “WhatsApp” orqali bog‘lanilib, yolg‘on axborot tarqatish va jamoatchilik fikrini chalg‘itishga urinish uchun qonunchilikda javobgarlik mavjudligi yuzasidan tushuntirish ishlari olib borilgan.
