JSST Kongo va Ugandadagi Ebola sabab xalqaro favqulodda holat e’lon qildi
Ebolaning Bundibugyo virusi shtammi sabab kasallanish holatlari oshmoqda.
Jahon sog‘liqni saqlash tashkiloti (JSST) Kongo Demokratik Respublikasi hamda Ugandada Ebola kasalligi tarqalishi ortidan xalqaro miqyosda tashvish uyg‘otadigan sog‘liqni saqlash sohasidagi favqulodda holat e’lon qildi.
JSST bayonotiga ko‘ra, tashkilot bosh direktori a’zo davlatlar bilan maslahatlashuvlardan so‘ng Bundibugyo virusi sabab yuzaga kelgan epidemiya bo‘yicha tegishli qarorni qabul qilgan.
Tashkilot ushbu vaziyat pandemiya emasligini, biroq xalqaro darajada jiddiy xavotir uyg‘otuvchi sog‘liqni saqlash favqulodda holati sifatida baholanayotganini ta’kidlagan.
JSST ma’lumotlariga ko‘ra, Kongo Demokratik Respublikasining uchta hududida Ebola bilan bog‘liq deb gumon qilinayotgan 246 ta kasallanish holati qayd etilgan. Shuningdek, 80 nafar bemorning vafot etgani ma’lum qilingan. Ulardan sakkizta holat laboratoriya tekshiruvlari orqali tasdiqlangan.
Ugandada esa Ebola infeksiyasining ikkita holat aniqlangan bo‘lib, ulardan biri o‘lim bilan yakunlangan.
Mutaxassislar kasallikning yanada keng tarqalishining oldini olish maqsadida epidemiologik nazorat va xalqaro hamkorlik choralarini kuchaytirish zarurligini ta'kidlamoqda.
