Prezident Shavkat Mirziyoyev BMT-Habitat direktori bilan uchrashdi
Uchrashuvda barqaror urbanizatsiya sohasida hamkorlikni kengaytirish masalalari muhokama qilindi.
Butunjahon urbanizatsiya forumi doirasida 18-may kuni O‘zbekiston Respublikasi Prezidenti Shavkat Mirziyoyev BMT Bosh kotibining o‘rinbosari, BMTning Aholi punktlari bo‘yicha dasturi (BMT-Habitat) ijrochi direktori Anaklaudiya Rossbax bilan uchrashuv o‘tkazdi.
Prezident matbuot xizmati xabariga ko‘ra, BMT-Habitat bilan shaharlarni barqaror rivojlantirish, shahar infratuzilmasini takomillashtirish hamda shaharsozlik sohasida zamonaviy yondashuvlarni joriy etish bo‘yicha hamkorlikni kengaytirish istiqbollari muhokama qilindi.
O‘tgan yili Samarqand iqlim forumi doirasida bo‘lib o‘tgan uchrashuvda erishilgan kelishuvlar ijrosi ham ko‘rib chiqildi. Hamkorlikni yanada kengaytirish, jumladan, qo‘shma “yo‘l xaritasi”ni tayyorlash, sohaga oid loyihalarni ilgari surish hamda ekspertlar o‘rtasidagi aloqalarni kengaytirish muhimligi ta’kidlandi.
O‘zbekiston Prezidenti tomonidan Butunjahon urbanizatsiya forumida ilgari surilgan tashabbuslarni amalga oshirish masalalari yuzasidan ham fikr almashildi.
