Ayrim pedagoglarga samolyot va poyezd chiptalari uchun chegirma berilishi mumkin

O‘zbekistonda ayrim pedagoglarga mamlakat bo‘ylab sayohat qilish uchun samolyot va poyezd chiptalariga chegirma berilishi mumkin. Bu bo‘yicha qaror loyihasi jamoatchilik muhokamasi uchun e’lon qilindi.

 

Loyihaga ko‘ra, 2026/2027-o‘quv yilidan boshlab ayrim toifadagi pedagoglar uchun O‘zbekiston hududi bo‘ylab avia va temiryo‘l chiptalariga yilda bir marta chegirma berish tartibini doimiy asosda joriy etish taklif qilinmoqda.

 

Imtiyoz quyidagi pedagoglarga tatbiq etilishi rejalashtirilgan:

 

•  respublika reytingida top-100 talikka kirgan umumta’lim hamda maktabgacha ta’lim tashkilotlari pedagoglariga;
•  top-20 talikka kirgan texnikumlar pedagoglariga;
• top-10 talikka kirgan oliy ta’lim muassasalari pedagoglariga.

 

Qaror loyihasida samolyot va poyezdlar (yuqori tezlikda harakatlanuvchi poyezdlardan tashqari) uchun erkin sotuvdagi ekonom klass hamda plaskart yoki kupe vagonlari chipta tariflariga 15 foiz chegirma berilishi nazarda tutilgan. Bunda sayohat boshqa yo‘nalishlarga o‘tkazishsiz, to‘g‘ridan to‘g‘ri borish va qaytish shaklida amalga oshirilishi belgilangan.

 

Shuningdek, Maktabgacha va maktab ta’limi vazirligi hamda Oliy ta’lim, fan va innovatsiyalar vazirligi tomonidan O‘zbekiston temir yo‘llari va Uzbekistan Airways’ga reytingga kirgan ta’lim muassasalari haqidagi ma’lumotlar muntazam taqdim etib boriladi.

 

Ta’lim muassasalari rahbarlari esa O‘zbekiston bo‘ylab sayohat qilish istagini bildirgan pedagoglarga ish joyi va lavozimi ko‘rsatilgan ma’lumotnoma beradi.

 

Loyihada qayd etilishicha, mazkur tashabbus bog‘cha tarbiyachilari, maktab o‘qituvchilari va oliy ta’lim muassasalari professor-o‘qituvchilarining jamiyatdagi hurmat-e’tiborini oshirish, ularning mashaqqatli mehnatini moddiy va ma’naviy rag‘batlantirish hamda dam olish vaqtlarini mazmunli tashkil etishga xizmat qiladi.

 

Bundan tashqari, ushbu imtiyoz ta’lim muassasalari o‘rtasida sog‘lom raqobatni kuchaytirishi va pedagoglarning o‘z ustida yanada faol ishlashiga motivatsiya bo‘lishi ta’kidlangan.