Ebola epidemiyasi oqibatida halok boʻlganlar soni 131 nafarga yetdi
Dunyo bo'ylab Ebola bilan kasallanishning 500 dan ortiq gumon qilingan holati qayd etilgan.
Jahon sog‘liqni saqlash tashkiloti bosh direktori Tedros Adhanom Gebreyesus Jenevada bo‘lib o‘tgan 79-Jahon sog‘liqni saqlash assambleyasida Ebola kasalligi bo‘yicha so‘nggi vaziyat yuzasidan ma’lumot berdi.
Uning ta’kidlashicha, dunyo bo‘ylab Ebola virusi bo‘yicha 500 dan ortiq gumon qilingan holatlar qayd etilgan bo‘lib, 131 nafar o‘lim holati tasdiqlangan.
Vaziyat eng keskin tarzda Kongo Demokratik Respublikasida kuzatilmoqda. Bu yerda virus bir nechta hududlarga tarqalib, yangi holatlar qayd etilmoqda. JSST mutaxassislari epidemiya ko‘lami rasmiy raqamlardan ham yuqori bo‘lishi mumkinligini bildirmoqda va vaziyatni jiddiy xavf sifatida baholamoqda.
Shuningdek, qo‘shni Uganda hududida ham infeksiya holatlari aniqlangan. Ayrim qo‘shni davlatlar chegaralarda sanitariya nazoratini kuchaytirgan.
Mutaxassislar Ebola tarqalishini cheklashda asosiy omil sifatida kontaktlarni aniqlash, sanitariya qoidalariga rioya qilish va xavfsiz tibbiy choralarni kuchaytirish zarurligini ta’kidlamoqda.
