O‘zbekistonda gidrometeorologiya va aviatsiya xavfsizligi tizimi modernizatsiya qilinadi
Mamlakatda ob-havo ma'lumotlarining aniqligini oshirish, xavfli gidrometeorologik hodisalar haqida erta ogohlantirish tizimini takomillashtirish va milliy aviatsiya parvozlari xavfsizligini ta'minlashga qaratilgan qaror qabul qilindi.
Vazirlar Mahkamasi tomonidan gidrometeorologiya xizmati infratuzilmasini rivojlantirish hamda fuqarolik aviatsiyasi parvozlari xavfsizligini meteorologik ta’minlashni takomillashtirishga qaratilgan 252-sonli qaror qabul qilindi. Bu haqda Ekologiya qoʻmitasi matbuot xizmati xabar berdi .
Hujjatga muvofiq, mamlakatda ob-havo prognozlarining aniqligini oshirish, xavfli gidrometeorologik hodisalar haqida erta ogohlantirish tizimini rivojlantirish hamda milliy aviatsiya xavfsizligini xalqaro standartlar asosida ta’minlash bo‘yicha kompleks chora-tadbirlar belgilandi.
Xususan, 2027–2028 yillarda O‘zbekistonning tog‘li hududlarida qor qoplamini kuzatish uchun zamonaviy masofaviy qor o‘lchash stansiyalarini o‘rnatish va mavjud tizimlarni yangilash rejashtirilgan.
Shuningdek, 2026–2028 yillar davomida mamlakat aeroportlarida avtomatik aviatsiya ob-havo stansiyalarini modernizatsiya qilish dasturi amalga oshiriladi.
Qaror doirasida Xorazm viloyatidagi Urganch xalqaro aeroporti hududida aviatsiya ob-havo stansiyasini modernizatsiya qilish, uni zamonaviy texnik jihozlar bilan ta’minlash hamda zarur infratuzilmani yangilash ishlari ham ko‘zda tutilgan.
Bundan tashqari, uchish-qo‘nish yo‘lagi bo‘ylab elektr ta’minoti, aloqa, internet va zaxira generatorlar bilan to‘liq jihozlangan avtomatlashtirilgan aviatsiya ob-havo stansiyalarini o‘rnatish belgilangan.
