Qirg‘iziston tarixiy adolat tiklanishiga umid qilmoqda — Sadir Japarov

 

Sadir Japarov BMT Xavfsizlik Kengashining doimiy bo‘lmagan a’zolari saylovlari oldidan davlat rahbarlariga murojaat qilib, Qirg‘iziston nomzodini qo‘llab-quvvatlashga chaqirdi.Bu haqda Kazinform xabar berdi.

Qirg‘iziston prezidenti o‘z murojaatida dunyoda geosiyosiy keskinlik kuchayib borayotgani, harbiy mojarolar davom etayotgani va xalqaro tizim teng huquqli vakillikka ehtiyoj sezayotganini ta’kidlagan.

“Bunday sharoitlarda BMTga a’zo davlatlarning Xavfsizlik Kengashida inklyuziv va teng huquqli vakilligi hamda uning butun xalqaro hamjamiyat nomidan qaror qabul qiluvchi organ sifatidagi qonuniyligini saqlab qolish masalasi birinchi o'ringa chiqadi”, — dedi Japarov.

Uning qayd etishicha, Qirg‘iziston boshqa 60 ga yaqin davlat qatori shu paytgacha hech qachon Birlashgan Millatlar Tashkiloti Xavfsizlik Kengashi a’zosi bo‘lmagan. Shu bilan birga, mamlakatning asosiy raqibi sifatida ko‘rilayotgan Filippin avval to‘rt marta Kengash tarkibidan joy olgan.

Qirg‘iziston rahbari mamlakatning ehtimoliy saylanishi tarixiy adolatni tiklash va kichik, rivojlanayotgan hamda dengizga chiqish imkoniga ega bo‘lmagan davlatlarning global xavfsizlik masalalaridagi ishtirokini kengaytirishga xizmat qilishini bildirdi.

Japarov, shuningdek, harbiy mojarolarga sarflanayotgan xarajatlar 3 trillion dollardan oshganini ta’kidlab, ushbu mablag‘lar ekologiya va ocharchilikka qarshi yo'naltirilganda, “sayyorani gullab-yashnayotgan bog‘ga aylantirish mumkin bo‘lishini” qayd etgan.

 

Bayonotga ko‘ra, Qirg‘iziston saylangan taqdirda vositachilik mexanizmlarini rivojlantirish, profilaktik diplomatiyani kuchaytirish, yadroviy qurolsizlanishni qo‘llab-quvvatlash hamda iqlim va xavfsizlik masalalari o‘rtasidagi bog‘liqlikni mustahkamlash tarafdori bo‘ladi.

Ma’lumot uchun, Birlashgan Millatlar Tashkiloti Xavfsizlik Kengashi saylovi 2026-yil 3-iyun kuni Nyu York shahrida bo‘lib o‘tadi.