Kattaqo‘rg‘onda sobiq hokim o‘rinbosari olgan porasini qaytarayotganida qo'lga tushdi
Bulung‘ur tumanida esa soliq inspeksiyasi boshlig‘i o‘rinbosari pora olayotgan vaqtida ushlandi.
Huquqni muhofaza qiluvchi organlar tomonidan Samarqand viloyatida korrupsiyaga oid ikki holat fosh etildi.
Birinchi holatda, Bulung‘ur tumanida faoliyat yurituvchi “Buxgalteriya markazi” davlat muassasasi hisobchisi qishloq xo‘jaligi mahsulotlari yetishtirishga ixtisoslashgan fermer xo‘jaligiga hisoblangan 150 million so‘mlik soliq qarzdorligini mansabdor tanishlari orqali kamaytirib berishni va’da qilgan.
Ma’lum qilinishicha, u fermer xo‘jaligi rahbaridan dastlab 3 million so‘m olgan, keyinchalik esa qo‘shimcha 15 million so‘m talab qilgan. Tezkor tadbir davomida ushbu mablag‘ni Bulung‘ur tumani soliq inspeksiyasi boshlig‘i o‘rinbosari bilan birgalikda olayotgan vaqtida gumonlanuvchilar ashyoviy dalillar bilan qo‘lga olingan.
Ikkinchi holatda esa, 2025-yilda Kattaqo‘rg‘on tumani hokimi o‘rinbosari lavozimida ishlagan shaxs fuqaroni tuman tibbiyot birlashmasiga ishga joylashtirib qo‘yish evaziga 14 million so‘m olgani aniqlangan.
Tergovga ko‘ra, u o‘z va’dasini bajarmagan. Tezkor tadbir davomida sobiq mansabdor muqaddam olgan mablag‘ hisobidan 1000 AQSH dollarini qaytarayotgan vaqtida uning noqonuniy harakatlari fosh etilgan.
Hozirda har ikki holat yuzasidan jinoyat ishlari qo‘zg‘atilib, tergov harakatlari olib borilmoqda.
