Namanganda do‘l xavfini kamaytirish uchun bulutlarga 57 ta snaryad otildi
“O‘zgidromet” ma’lumotiga ko‘ra, do‘lga qarshi ishlar respublikaning bir qator hududlarida tizimli davom etmoqda.
Namangan viloyatining Kosonsoy va Yangiqo‘rg‘on tumanlarida do‘l yog‘ishi xavfini kamaytirish maqsadida bulutlarga maxsus ta’sir ko‘rsatish ishlari amalga oshirildi. Bu haqda “O‘zgidromet” ma’lum qildi.
Idora xabariga ko‘ra, joriy yil may oyi boshida hududlarda konvektiv bulutlarga ta’sir ko‘rsatilib, do‘l hosil bo‘lish jarayonlarini zaiflashtirish bo‘yicha profilaktik choralar ko‘rilgan. Ushbu ishlar 1, 11 va 12-may kunlari amalga oshirilgan.
Ma’lum qilinishicha, jarayon davomida jami 57 dona “Alazan-6” turidagi do‘lga qarshi vositalar qo‘llanilgan.
“O‘zgidromet” mutaxassislarining ta’kidlashicha, so‘nggi yillarda bahor mavsumida qisqa muddatli kuchli yog‘ingarchiliklar, jala va do‘l hodisalari ko‘payib bormoqda. Bunga asosiy sabab sifatida global iqlim o‘zgarishlari ko‘rsatilmoqda.
Shuningdek, idora ma’lumotiga ko‘ra, yog‘in miqdori keskin oshmagan bo‘lsa-da, qisqa vaqt ichida intensiv yog‘ish holatlari sel va suv toshqinlari xavfini kuchaytirmoqda.
“O‘zgidromet”ning Gidrometeorologik jarayonlarga ta’sir ko‘rsatish xizmati Namangan, Samarqand, Qashqadaryo va Surxondaryo viloyatlarida do‘lga qarshi ishlarni tizimli ravishda olib bormoqda.
Idora qayd etishicha, do‘lga qarshi choralarga qaramasdan, ayrim hollarda qisqa muddatli do‘l hodisalari kuzatilishi mumkin.
