Toshkent metrosida harakat intervali 2–3 daqiqagacha qisqartiriladi
Metro bekatlari sonini 79 taga, liniyalar uzunligini esa 103 kilometrga kengaytirish rejalashtirilgan.
Joriy yil 15-may kuni Prezidentning “Toshkent metropoliteni faoliyatining samaradorligini oshirishga doir qo‘shimcha chora-tadbirlar to‘g‘risida”gi PQ–191-son qarori imzolandi. Bu haqda Adliya vazirligi xabar berdi.
Hujjatga muvofiq, 2030-yilgacha metropoliten tizimini rivojlantirish bo‘yicha asosiy maqsad va vazifalar belgilandi. Unga ko‘ra, kunlik yo‘lovchi tashish hajmini 1,8 million nafarga yetkazish, metro bekatlari sonini 79 taga, liniyalar uzunligini esa 103 kilometrga kengaytirish rejalashtirilgan.
Shuningdek, metro poyezdlari harakat intervalini 2–3 daqiqagacha qisqartirish ko‘zda tutilgan.
2028-yil yakuniga qadar metro bekatlariga kirish joylari hamda o‘tish yo‘laklarida yo‘lovchilar xavfsizligini ta’minlagan holda vening avtomatlari va kichik savdo obyektlarini joylashtirish rejalashtirilgan.
Shuningdek, metro bekatlari atrofida “Park & Ride” tizimi joriy etiladi. Unga ko‘ra, avtomobil to‘xtash joylaridan foydalangan yo‘lovchilarga metro chiptalarida chegirmalar berish hamda avtoturargoh to‘lovlarini metro chiptasi orqali qoplash mexanizmlari yo‘lga qo‘yiladi.
Qarorda, shuningdek, metro tunnellari va bekatlarida xavfsizlik talablariga rioya qilgan holda tadbirkorlarga auksion asosida ijara tartibida faoliyat yuritish imkoniyati yaratish ham nazarda tutilgan.
