Senator Tursinxan Xudaybergenov “Fidokorona xizmatlari uchun” ordeni bilan mukofotlandi
Mukofot senatorning ijtimoiy-siyosiy hayotdagi faol ishtiroki hamda tavalludining 75-yilligi munosabati bilan berildi.
O‘zbekiston Prezidenti Shavkat Mirziyoyevning farmoni bilan Prezidentning Orolbo‘yi mintaqasini barqaror rivojlantirish masalalari bo‘yicha maslahatchisi, senator Xudaybergenov Tursinxan Aydarovich “Fidokorona xizmatlari uchun” ordeni bilan mukofotlandi.
Farmonda qayd etilishicha, u davlat organlaridagi ko‘p yillik fidokorona mehnati, mamlakatda amalga oshirilayotgan keng ko‘lamli islohotlardagi ulkan xizmatlari, shuningdek, Orolbo‘yi mintaqasini rivojlantirish, hudud infratuzilmasini yaxshilash, ekologik vaziyatni sog‘lomlashtirish va aholi muammolarini hal etish borasidagi samarali faoliyati uchun taqdirlangan.
Shuningdek, mukofot senatorning ijtimoiy-siyosiy hayotdagi faol ishtiroki hamda tavalludining 75-yilligi munosabati bilan berilgani ta’kidlangan.
Xudaybergenov 2010-yilning martidan 2016-yil dekabrigacha FVVga rahbarlik qilgan. Undan so‘ng prezidentning jismoniy va yuridik shaxslar murojaatlari bilan ishlashni nazorat qilish va muvofiqlashtirish bo‘yicha davlat maslahatchisi lavozimiga tayinlangan.
