Fan klublari terma jamoaning o‘n ikkinchi o‘yinchisi — Shavkat Mirziyoyev
Prezident “Bunyodkor” stadionida bo‘lib o‘tayotgan futbol bo‘yicha milliy terma jamoani jahon chempionatiga kuzatish marosimida nutq so‘zladi.
Prezident Shavkat Mirziyoyev Toshkentdagi “Bunyodkor” stadionida futbol bo‘yicha O‘zbekiston milliy terma jamoasini jahon chempionatiga kuzatish marosimida ishtirok etib, sportchilar hamda muxlislarga murojaat qildi.
Davlat rahbari AQSh, Meksika va Kanada mezbonlik qiladigan futbol bo‘yicha jahon chempionati oldidan barchani katta futbol bayrami bilan tabriklab, ushbu kun o‘zbek futboli tarixidagi muhim sahifa ekanini ta’kidladi.
Prezident milliy terma jamoaning tarixiy natijasini e’tirof etib, futbolchilar, ularning ota-onalari, ustoz va murabbiylari hamda jamoaning barcha a’zolariga minnatdorlik bildirdi.
Shavkat Mirziyoyev muxlislarning jamoaga bo‘lgan sadoqati va qo‘llab-quvvatlovini alohida qayd etib, ularni haqiqiy vatanparvarlik namunasi deb atadi.
“Sizlarning milliy jamoaga bo‘lgan mehr va sadoqatingiz har qancha tahsinga loyiq”, — dedi davlat rahbari.
Prezident stadiondagi fan-klublar faoliyatiga ham to‘xtalib, ular har bir uchrashuvda “o‘n ikkinchi o‘yinchi” vazifasini bajarayotganini ta’kidladi.
“Fan-klublar a’zolari har bir o‘yinda chin o‘zbekona, betakror uslubi bilan o‘n ikkinchi o‘yinchi vazifasini munosib bajarmoqda. Ishonchim komil, ular mundialda ham minglab yurtdoshlarimiz, xorijdagi vatandoshlarimiz bilan birga xuddi hozirgidek g‘ayrat-shijoat va hayqiriqlar bilan futbolchilarimizni qo‘llab-quvvatlashadi”, — dedi Shavkat Mirziyoyev.
Davlat rahbari futbol O‘zbekistonda allaqachon har bir oilaning do‘stiga aylanganini qayd etib, stadionga farzandlari va nabiralari bilan kelayotgan muxlislar soni ortib borayotganini misol keltirdi. Prezident yosh avlod sportchilarning yutuqlaridan ruhlanib, kelajakda yangi chempionlar yetishib chiqishiga ishonch bildirdi.
Nutq davomida mamlakatda sport infratuzilmasini rivojlantirish bo‘yicha amalga oshirilayotgan loyihalar haqida ham ma’lumot berildi.
Qayd etilishicha, o‘tgan yili Toshkentda 100 gektardan ortiq hududda beshta yirik sport majmuasini o‘z ichiga olgan zamonaviy Olimpiya shaharchasi foydalanishga topshirilgan.
Shuningdek, Yangi Toshkent hududida FIFA standartlariga to‘liq javob beradigan, 55 ming tomoshabinga mo‘ljallangan yangi stadion qurilishi davom etmoqda.
Prezidentning ta’kidlashicha, ushbu arena millionlab futbol muxlislari uchun katta sovg‘a bo‘ladi hamda O‘zbekistonda nufuzli xalqaro sport musobaqalarini o‘tkazish imkoniyatlarini kengaytiradi.
