“Futbolchilarimizni zamonamiz qahramonlari desak arziydi” — Shavkat Mirziyoyev
Prezident Shavkat Mirziyoyev futbol bo‘yicha O‘zbekiston milliy terma jamoasi bilan uchrashuv o‘tkazdi.
Prezident Shavkat Mirziyoyev futbol bo‘yicha O‘zbekiston milliy terma jamoasi bilan uchrashuv o‘tkazdi hamda jamoaning jahon chempionatiga yo‘llanma olishini tarixiy voqea sifatida baholadi.
Davlat rahbari AQSh, Meksika va Kanada maydonlarida bo‘lib o‘tadigan futbol bo‘yicha jahon chempionati oldidan futbolchilar va muxlislarni tabriklab, xalq bu kunlarni 34 yil kutganini ta’kidladi.
Prezident so‘zlariga ko‘ra, futbolchilar har bir uchrashuvga yuqori tayyorgarlik va katta mas’uliyat bilan yondashib, maydonga faqat g‘alaba uchun tushgan.
“Futbolchilarimizni O‘zbekiston tarixida yangi sahifa ochgan zamonamiz qahramonlari deb aytsak arziydi”, — dedi davlat rahbari.
Shuningdek, Shavkat Mirziyoyev mundial yo‘llanmasi qo‘lga kiritilgan kuni quvonchdan uxlay olmaganini aytib, futbolchilar, ularning ota-onalari, ustozlari va murabbiylariga minnatdorlik bildirdi.
Uchrashuvda taniqli shoir, yozuvchi va san’atkorlar ham ishtirok etgani qayd etildi. Prezidentning aytishicha, ular futbolchilarning jasorati haqida yangi she’rlar, qo‘shiqlar va asarlar yaratmoqda.
Davlat rahbari tadbirkorlar ham terma jamoa muvaffaqiyatidan faol foydalanayotganini bildirib, biznes vakillari futbol orqali o‘z milliy brendlarini dunyoga tanitayotgani va yangi bozorlarga chiqayotganini ta’kidladi.
Prezident futbolchilarning yutuqlari yoshlar uchun katta motivatsiya bo‘layotganini ham qayd etdi.
“Men ham mashhur futbolchi bo‘laman” degan bolalar safi ko‘paymoqda. Xalqimiz sizlar bilan doim faxrlanadi”, — dedi Shavkat Mirziyoyev.
