O‘zbekistonda “Har bir mahalla — futbol maydoni” dasturi yo‘lga qo‘yiladi

Prezident Shavkat Mirziyoyev O‘zbekistonda futbolni rivojlantirish bo‘yicha amalga oshirilgan islohotlar natijasida havaskor va professional futbolchilar soni keskin oshganini ma’lum qildi.

 

Davlat rahbari futbol bo‘yicha O‘zbekiston milliy terma jamoasi bilan uchrashuvda sport, xususan futbolga qaratilgan e’tibor va yaratilgan infratuzilma bugungi yutuqlarga mustahkam zamin bo‘lganini ta’kidladi.

 

Qayd etilishicha, so‘nggi yillarda hududlarda 200 dan ortiq yirik sport inshooti, qariyb 4 mingta xususiy sport klubi faoliyat boshlagan. Shuningdek, 1,5 mingdan ziyod mahallada sport maydonchalari barpo etilgan.

 

Poytaxtda zamonaviy Olimpiya shaharchasi qurilib, Yuqori Chirchiq tumanida “Milliy futbol markazi” ishga tushirilgan. Har bir viloyatda professional futbol akademiyasi va futbol maktablari tashkil etilgan.

 

Prezidentning aytishicha, amalga oshirilgan ishlar natijasida havaskor futbolchilar soni 5 million nafarga yetgan. Futbol bilan muntazam shug‘ullanuvchilar soni 1 million 300 mingdan oshgan bo‘lsa, professional futbolchilar soni 17 ming nafarga yetgan.

 

Davlat rahbari futbol tizimida korrupsiya va tanish-bilishchilikka barham berilganini ham qayd etdi.

 

“Eng asosiysi, futbolda korrupsiya va tanish-bilishchilik degan illatlarga barham berildi. Ochiq va shaffof tizim yaratildi. Bu eng iqtidorli yoshlarni, rostakam iste’dodlarni katta maydonga olib chiqdi”, — dedi Shavkat Mirziyoyev.

 

Prezident futbol nafaqat professional sport turi, balki yoshlar tarbiyasi, sog‘lom turmush tarzi, intizom va vatanparvarlik maktabi bo‘lishini ta’kidladi.

 

Shu munosabat bilan O‘zbekistonda “Har bir mahalla — futbol maydoni” dasturi boshlanishi ma’lum qilindi. Unga ko‘ra, dastur umummilliy harakatga aylantiriladi va har bir mahallada bolalar uchun futbol bilan shug‘ullanish imkoniyatlari kengaytiriladi.

 

Dastur doirasida “Mahalla ligasi” tashkil etiladi. Unda 12–17 yoshli o‘g‘il-qizlardan iborat mahalla futbol jamoalari tuziladi.

 

Har yili havaskor futbolchilar o‘rtasida “mahalla — tuman — viloyat — respublika” bosqichlaridan iborat musobaqalar o‘tkaziladi.

 

Prezidentning ta’kidlashicha, “Mahalla ligasi” professional futbol klublari uchun iqtidorli yoshlarni saralab olishda muhim baza vazifasini bajaradi.