Prezident Shavkat Mirziyoyev BAA Hukumat ishlari bo‘yicha vazirini qabul qildi
BAAning ilg‘or boshqaruv tajribasini O‘zbekistonda joriy etish bo‘yicha qo‘shma “yo‘l xaritasi” izchil amalga oshirilmoqda.
Prezident Shavkat Mirziyoyev 22-may kuni Birlashgan Arab Amirliklari Hukumat ishlari bo‘yicha vaziri Muhammad bin Abdulloh al-Gargaviy boshchiligidagi delegatsiyani qabul qildi.
Uchrashuv avvalida vazir davlat rahbariga BAA Prezidenti Shayx Muhammad Ol Nahayon, mamlakat Bosh vaziri, Vitse-prezidenti va Dubay Amiri Shayx Muhammad Ol Maktum hamda Vitse-prezident Shayx Mansur Ol Nahayonning samimiy salomi va ezgu tilaklarini yetkazdi.
Muloqot chog‘ida O‘zbekiston va BAA o‘rtasidagi do‘stlik hamda strategik sheriklik munosabatlarini yanada rivojlantirish, davlat boshqaruvi samaradorligini oshirish va ushbu sohada amalga oshirilayotgan islohotlar natijadorligini ta’minlash masalalari muhokama qilindi.
Tomonlar ustuvor yo‘nalishlarda amaliy hamkorlik izchil mustahkamlanayotganini alohida mamnuniyat bilan qayd etdilar. Xususan, davlat xizmati mexanizmlarini takomillashtirishning 10 ta asosiy yo‘nalishi bo‘yicha qo‘shma “yo‘l xaritasi” muvaffaqiyatli amalga oshirilayotgani ta’kidlandi.
Shuningdek, BAAning byurokratiyani qisqartirish borasidagi ilg‘or tajribasi asosida maxsus loyiha ofisi ishga tushirilgani qayd etildi. “Besh million sun’iy intellekt yetakchilari” ta’lim dasturi doirasida erishilgan natijalar ham yuqori baholandi.
Uchrashuv davomida “Davlat organlari faoliyati samaradorligini baholash” loyihasi doirasidagi tashabbuslarni kengaytirish, jumladan, mahalliy hokimiyat organlari vakillarini ham jalb etish masalalari ko‘rib chiqildi.
Bundan tashqari, umummilliy kitobxonlik harakatini yo‘lga qo‘yish, yoshlarni qo‘llab-quvvatlashga qaratilgan loyihalarni amalga oshirish, qo‘shma taraqqiyot forumlarini tashkil etish hamda O‘zbekiston rivojiga xizmat qiluvchi strategik va konseptual hujjatlarni ishlab chiqish bo‘yicha kelishuvlarga erishildi.
